Lémur: outro dos destacados no abrollar de Ourense

Non moi lonxe do centro, pero nunha contorna marcadamente rural - casas unifamiliares, un paseo fluvial, campos e leiras -, tres modernas torres veñen rachar a paisaxe do ourensán bairro do Polvorín.

Desde hai uns meses, no baixo dunha delas, Lémur pon o seu gran de area na metamorfose, cun espazo onde lume e produto van da man. A brasa, aquí, non é só unha técnica: é o fío condutor – a grella vasca á vista, para quen lle preste a barra.

Percorremos o mar, primeiro: carneiro e berberechos e vieiras, notábeis os moluscos; tamén kokotxas e carabineiro, ambos con ovo. E pechamos na terra, cun bo chuletón e unha escolma de queixos do país. Oficia na sala https://www.instagram.com/santiago_sergio_76/, quen non nos deixou beber mal 😉

Talvez Ourense sexa a agochada de Galicia, algo lonxe do barullo gastronómico da costa. Pero entre os locais xa asentados e novidades como esta, á forza ten que abrollar.