Nordestada (Portosín): o que coñeces, pero mellor

Igual, cando olledes para as fotos, pensades: pero isto que nos amosas non é tan diferente doutras cousas que temos visto recentemente. É certo, estamos na vella lonxa de Portosín, en agosto, e a tempada e o produto das rías manda.

Pero vaia por diante que, se me gustou moito Nordestada, é porque case todos os pratos, se non todos, teñen ese sutil matiz que os fan diferentes, superiores.

A ensaladilla - pataca, cenoura, ovo - cremosa; o bonito de Burela ben frío, sabedor; un aceite forte, amargo: tremendo prato. A tosta de anchoa, con manteiga de allo negro, diferencial. A melosidade da berenxena complementando a prancha dos chipiróns, a intensidade das croquetas de polbo á feira. O escabeche de limóns cas navallas gordas, perfeitas de punto. Como perfeito estaba o do ollomol. Até o melón, fresquiño e con menta, foi unha sobremesa estupenda (combinado cuns camaróns, o que causou certo rebumbio 😉).

E, ademáis, escolma de viños galegos das boas. Son de Arrieiro Añadas de Xulia Bande acompañou de marabilla.

Nel Parada pasa a formar parte dos meus heroes de vila, dos que aguantan os longos invernos de Galicia facendo cousas que merecen moito a pena. E aquí estamos nós para vir gozalas e gabalas.

Ver esta publicación en Instagram

Una publicación compartida de Manoel Foucellas (@manoelfoucellas)